Career Advice

讓你同同事好好相處嘅7個貼士!

3
min read
Tiffany Wong

有幾多人試過返工嘅時候同同事嗌完交之後晚上又去一齊飲啤酒?我諗有好多。呢種同我哋出生入死嘅「戰友」感覺,令我哋嘅工作變得易捱好多,甚至令返工變得愉快。有人話有好同事重要過有份筍工,係真嘅。有研究顯示同同事相處得好甚至可能令你更加長命。你唔一定要同每一個同事都做到好好朋友,但係相敬如賓、以禮相待,以專業嘅態度對待每個人對於建立一個正面嘅辦公室氣氛有好大幫助。

一個由人格與社會心理學評論出版嘅研究顯示,工作上嘅社交關係對於我哋嘅心理同身體健康有直接影響。喺工作上同其他人嘅社交聯繫越強,個人通常會越健康。專家發現同同事建立強嘅連結唔只對於我哋嘅健康有良好嘅影響,更加能夠避免被工作「burn out」。呢項研究分析咗超過19,000個來自15個國家嘅不同職業嘅參加者,另外亦都發現令參加者健康嘅唔單只係來自所屬工作團隊嘅互相扶持,而係佢哋從所屬嘅社交群組入面得到人生意義。

另一個研究分析咗20年間嘅820個成年人醫療紀錄,發現最長壽嘅人都有聲稱佢哋嘅同事係友善嘅,而且會幫佢哋解決問題。相反,上司嘅支持似乎對於壽命冇明顯嘅影響。另外,研究人員亦都發現喺男人身上,有決策權力會令佢哋更加長壽,但係女人身上,擁有決策權就會減短佢哋嘅壽命。但係研究人員亦都備注,參與研究嘅對象都係從事藍領工作,而呢啲工作入面好少會由女人擔當決策者。

所以,如果你想長命啲嘅話,快啲離開令你終日愁眉苦面嘅工作環境,尋找一個可以同同事相處得融洽嘅工作環境啦!

7個同同事保持良好關係嘅小貼士:

同同事保持良好關係好似喺你本身已經繁忙嘅工作上加添壓力,本身已經咁忙㗎啦,仲要夾硬同唔同性格、工作風格、年紀、性別、種族嘅人保持良好關係,我邊有咁多時間處理咁多嘢啊?其實唔使咁緊張,好多細微嘅位置做多一小步,就可以好好多。

1)互相尊重

避免做出冒犯其他人嘅行為或者講出傷害人嘅說話。食完飯執返枱、唔好喺雪櫃攞咗人哋嘅嘢食、有病唔好返工傳染人、唔好喺人哋做嘅工作攞彩。

2)唔好懶熟

唔好以為同事同你好熟就可以分享一啲太過私人嘅嘢,或者一啲會令人尷尬嘅敏感題材,例如宗教、政治、性取向等等。

3)從一開始建立良好關係

返一份新工嘅時候,緊記以禮待人,保持微笑,有需要嘅時候發問,接受其他人主動嘅協助,其他人向你查問意見嘅時候有禮貌地發表。如果有人邀請你去食飯就盡量去啦。

4)學習同難相處嘅同事好好磨合

每個工作地方都會有一兩個唔係咁好相處嘅同事,但係你都要學習同佢地合作㗎!無論佢哋係太多嘢講、太八卦、擦鞋仔、怨天怨地定係鍾意搶人功勞,記住做好自己,做一個有禮貌、幫得手嘅人。起碼咁樣你自己會好過一啲。

5)建立良好辦公室禮儀

喺辦公室嘅環境下,保持禮貌,唔好喺其他人做緊嘢嘅時候打電話傾私事,同同事溝通用返正統嘅電郵,電郵格式用返工作應有嘅格式。做嘢嘅時候收埋電話,一齊食飯嘅時候尊重餐廳嘅員工。

6)保持公德心、體諒別人

有時可以做吓小善行,例如請隔離位嘅同事飲杯咖啡或者買多個包俾佢,要趕deadline嘅時候留低幫手。

7)唔好刻意挑起紛爭或散播謠言

講八卦除咗會惹來麻煩之外,無論講嘅係唔係事實,根本做唔到任何野。你只會令同事信唔過你,擔心自己會變成下一個俾你唱衰嘅對象。

真誠、熱心支持同事只會為你、同事同埋公司帶嚟好處,亦可以提升你嘅精神同身體健康,你會喜歡返工,你又會賺取良好嘅口碑,提升晉升機會。宏觀啲嚟睇,你對同事嘅幫助同意見有助建立團隊精神、歸屬感同意義。呢啲種種都有助建立正面嘅關係,提升工作表現同埋改善健康。

Recommendations for You

Live Happyer: Mental Wellbeing at Happyer
Read
The Pros and Cons of Transferring Jobs Internally
Read
How To Train Your Remote Workforce
Read