Career Advice

面試成功嘅10個提示 10 Signs Your Interview Was a Success

3
min read

面試過後,係咪會好緊張不停諗自己表現成點呢?等我哋同你拆解一啲肯定嘅徵兆,話俾你聽你嘅面試有幾順利啦!


通常,離開嗰間角度焗到唞唔到氣嘅面試房輸一口氣之後,立即伴隨而來嘅係非常緊張自己剛才嘅表現。究竟頭先嘅面試係比一般長定比一般短,考官問晒佢要問嘅問題未呢,定係問到一半已經放棄咗再問落去呢?呢啲諗法會抹煞左我哋好多好嘅感覺,令我哋對自己好冇自信。


為咗避免浪費精力、避免因為啲無聊嘅原因削減左我哋應有嘅自信,千祈唔好過分分析自己嘅面試表現或者面試官對你嘅回應。過分擔心從來冇為我哋帶嚟任何好處。面試後過分嘅分析只會令我哋感到好大壓力、挫敗同浪費晒我哋嘅時間同心機,甚至會將一個明明做得幾好嘅面試變成一個慘痛嘅經歷。不過,有建設性嘅反思係對你好嘅。兩者有啲咩唔同呢?


反思面試表現小貼士:

1)回想面試過程,分析一下你認為做得最好同最唔好嘅係乜嘢,你下一次可以點樣做得好啲?


2)整理一下你對間公司同份工作嘅感受,例如你會唔會好有衝勁加入呢間公司?有冇啲野係你發現你唔鍾意嘅呢?


好喇,係時候分析一下面試表現喇。


我應該留意啲乜嘢令我知道自己面試做得好定唔好呢?

以下嘅徵兆只係反映你喺面試嘅表現,你唔應該用嚟做你得唔得到錄用嘅提示。你亦都唔應該太執着咁數住以下嘅徵兆你中咗幾多樣。如果你淨係中咗其中兩三樣都唔使太擔心。係你人生之中,都冇咩機會會完全中晒以下10個徵兆。但係,以下嘅提示會幫助你發現有啲咩你做得好,或者相反可以幫你搵出有啲咩需要改善,例如改變下肢體語言等等。


1)面試時間長短

如果面試時間好短,例如少過30分鐘,咁可能係因為面試官根本有其他嘢分咗心,或者完全對你冇興趣。相反,面試太長,有機會係你係咁一輪嘴講晒好多唔相關嘅嘢,或者面試官好鍾意你,好想了解您多啲。係任何情況下,你都應該由面試官決定面試時間嘅長短,千祈唔好嘗試自己拖長或提早完結!


2)成功嘅面試通常都會帶有一種輕鬆同開放嘅氣氛,好似同一個老朋友傾偈咁。但係要小心,時刻要保持專業嘅態度。如果HR喜歡你嘅性格,你會有更大嘅機會得到錄用。


3)留意吓會唔會被問到「你有冇見緊其他公司呀?」呢啲係正面嘅語言,反映出公司有興趣請你,而想知道佢哋有幾多時間可以行動。


4)如果你踏出門口之前佢哋已經約你做下一次面試,表示佢哋對你非常有興趣。


5)如果面試官集中問你喺呢個職位上你會做啲乜嘢,而唔係只係集中喺你個人發展嘅問題上,佢哋有可能考慮緊聘請你,但係如果佢哋只係問咗你一兩句,可能純粹係佢哋自己本身已經定下嘅面試問題。


6)如果你都花咗唔少時間面試,而僱主想帶你去認識公司嘅其他員工,呢個係好好嘅徵兆,但仍然係面試嘅程序之一。緊記時刻保持專業嘅形象,比僱主睇吓你會點樣介紹自己同點樣同其他員工交流。


7)如果佢哋已經同你討論入職嘅薪酬,佢哋應該都係想盡快聘請你。


8)如果佢哋詳盡咁回答你嘅提問,咁代表佢哋唔想你對公司或者職位有任何疑問。


9)如果HR向你提供一個招聘過程嘅實際時間表,係好嘅徵兆!


10)如果面試官邀請你問問題,佢哋係想睇吓你對份工同公司有幾有興趣。記住,面試係雙向嘅,佢哋想向你推銷呢份工,亦都期望你向佢哋推銷自己。


除咗頭先提過嘅所有徵兆可以令你更加肯定自己喺對方嘅考慮名單之上,其實仲有好多比較微細嘅提示,例如正面嘅肢體語言(微笑、點頭、眼神交流等等),例如面試官同你傾偈,脫離本身定好要問你嘅面試問題,又或者人事部向你解釋返呢份工會得到嘅福利同津貼、佢哋讚賞你嘅經驗、能力、過往成績等等,仲有如果HR睇落好享受面試過程,向你派卡片、同你握手握得較耐、同你道別嘅時候表現得依依不捨、話你知佢會好快聯絡返你,呢啲都係面試嘅好精兆。


就算以上嘅徵兆你中咗大部份,都唔可以守株待兔,你都要主動啲喺面試之後做返啲嘢㗎!


面試後可以做啲咩呢?

1)攞晒所有你見過嘅人嘅聯絡資料,例如喺面試完結之前,問你嘅面試官攞佢嘅電郵地址,或者問櫃檯職員攞晒頭先見過你嘅人嘅電郵地址。


2)唔好放棄搵工。就算你感覺到你喺呢一個面試做得好好,或者對方好似好大機會會聘請你,都唔好cancel其他已經預約好嘅面試。比其他人同比自己多一個機會。


3)電郵道謝。但係記住要個人化同埋要特定為每一個同你面試過嘅人寫。唔好寫一封然後send晒俾所有人。喺電郵內文可以提及返喺面試過程中遇到嘅特別時刻,例如對方講過而你覺得好有啟發性說話,又或者如果你認為喺面試中有啲問題你答得未夠好,可以喺電郵裏面補充番。你應該多謝對方肯為你付出時間見你。如果係一間細嘅傳統公司,佢哋亦都會好欣賞你郵寄一啲感謝信或者感謝咭比佢哋,呢個舉動喺現今科技發達嘅社會之中係好特別同好令人記得嘅。


4)喺LinkedIn加你嘅面試官,而且可以寫一段短嘅訊息俾佢。如果面試官好快回覆你,代表佢都有興趣邀請你加入。


5)保持開放,唔好氣餒。無論面試前定面試後,都一定要保持專業、有禮貌,咁樣只會令你被取錄嘅機會有增無減。唔同嘅公司有唔同嘅招聘時間表,唔好過分執着你要幾時收到公司嘅回音。有啲唔怕醜嘅人甚至會喺面試完結之後直接問「你覺得我符唔符合呢份工嘅要求啊?」或者「有冇邊啲特定嘅範疇你哋會想知多啲㗎?」你亦都可以嘗試吓咁做,因為其實都冇乜得輸嘅,俾人見到你咁主動都係好事。


最後,總之喺招聘嘅任何時候都要保持以最佳狀態示人!千祈唔好放棄,你最終都會搵到合適自己嘅工!


Recommendations for You

10 Likely Job Interview Questions in 2021
Read
4 Answers to “Can You Tell Us Anything Else About Yourself” in a Job Interview
Read
How to Answer the Question "What Is Your Work Style" in a Job Interview?
Read