Career Advice

點解冇人請我㗎?——分析三個冇人請你嘅情景

3
min read
Tiffany Wong

搵工搵咗一段時間,但係你都仍然待業?可能去咗好多次面試,就係冇一間回覆你,或者send咗好多CV出去,就係冇一間邀請你去面試,無論你喺邊一個階段,以下落嚟我哋會分析一下每一個階段有啲乜嘢有可能嘅原因導致你未被取錄。

1)冇人邀請你去面試

Send完幾十份履歷出去之後,竟然冇一間公司邀請你去面試?唔使擔心,可能有啲嘢之前做錯咗,糾正返就會大大提升獲得面試嘅機會!

度身訂造履歷

履歷表必須要喺眾多應徵者之中脫穎而出先有機會得到對方考慮邀請你去面試。你可以根據每個職位嘅要求而按工作相關調一調履歷表上嘅次序。如果你係郵寄一份實體履歷表,你可以用厚少少嘅紙印出嚟,咁就會同其他應徵者嘅履歷表好唔同喇。

度身訂造求職信

每份工嘅求職信都一定要重新寫,你有責任幫個僱主了解返點解你適合呢一份工。你可以揀一兩點關於公司嘅特點同自己拉上關係,讓僱主唔會認為你呢一封只係千篇一律嘅罐頭求職信。

修補重要位置

你嘅履歷會唔會反映你有段時間冇工作呢?令你離開上一份工嘅係裁員定係其他特別原因?為咗令人唔好誤會係你工作表現上嘅問題,你可以加一兩句註解。

分散投資

你可能遇到一兩份你非常非常有興趣嘅工作,但係唔好因為咁而暫停搵工。記住,報得越多你就越多機會收到面試邀請。就算有一啲你唔係好大興趣嘅工作,你都可以當係面試練習,或者經過面試之後,你會對嗰啲公司有另一種睇法。

2)去完第一輪面試之後就冇回音

你可能經過電話、視像或者親身面試之後就再冇聽到公司嘅回音。咁樣起碼你可以肯定你嘅履歷同求職信都做得唔錯,只係面試技巧可能要提升一下。

做好資料蒐集

準備好人哋會問你關於佢哋公司嘅嘢,呢個係最基本嘅面試題目。你可以睇吓對方公司嘅網頁、社交媒體,甚至睇吓有冇近期嘅新聞。

保持同申請職位嘅關聯

喺面試過程中,避免講一啲同申請職位無關嘅工作經驗或者技巧,例如你申請嘅係客戶服務嘅職位,最好講返一啲關於對客嘅經驗,避免花太多時間談及其他完全無關嘅工作經驗,例如文書工作等等。

簡介自己嘅資歷

你可以積極咁樣介紹自己嘅學歷、資歷等等,最重要係將你自己嘅資歷同職位要求掛上關係,說明俾僱主聽呢啲嘢會點樣提升你嘅工作表現,點樣幫到你做呢份工。

準備好為自己解釋

同上述嘅修補重要位置一樣,有時僱主會發現你喺履歷上嘅空窗期,或者有段時間份份工都做唔長,你一定要準備好以一個得體嘅說法去解釋當時發生咩事,例如你係被裁員或者有其他嘅原因令你需要離職。但記住一定唔可以講大話,因為對方隨時可以聯絡你前僱主做背景審查。

3)有面試但冇人請

你可能每次都通過第二輪甚至第三輪面試,但係就係埋門一腳永遠都冇offer。咁嘅情況可能有唔同原因,你可以試吓以下嘅方法提升表現:

答案要中point

有第二輪面試表示你面試嘅能力都唔差,大體上可以俾人一個易於溝通,正面嘅印象。但係可能你再需要了解對方深入啲,或者聆聽多啲對方問嘅嘢,答案要答得更加深入、中point,令對方知道你並唔係只係talk得咁簡單。

有傾有講

避免一句起兩句止嘅答案,要同對方有傾有講,編織出一個有趣嘅對話。你可以準備一啲到時問對方嘅問題,表示你嘅興趣,亦都俾位對方講吓嘢。面試結束後,喺適當嘅時候以電郵跟進下自己嘅面試流程,去到乜嘢階段等等。當然,要做到呢一點,就要喺面試期間問吓對方有乜嘢聯絡方法。

合理嘅期望薪酬

講到人工,你必須要知道自己嘅市場價值去到邊度。千祈唔好定一個過高嘅期望薪酬,對方未必會花呢個力氣同你討價還價,如果有另一個同你差唔多資歷而開價合理嘅話,可能佢就會係被取錄嗰一個。

問有質素嘅問題

問一啲對對方有啟發性嘅問題,或者一啲令對方感覺到你在意佢哋嘅問題。面試官可能唔止一個,準備多一至兩條問題,帶起討論。

求職嘅過程最痛苦莫過於等待。以上嘅建議希望可以令你知道有咩方面需要提升,有啲乜嘢可以做,增加你被取錄嘅機會。無論發生乜嘢事,千其都唔好灰心,明天一定會更好㗎 !係咪啊?

Recommendations for You

How to Make the Most of Membership Clubs
Read
How To Train Your Remote Workforce
Read
Happyer Exclusive: Mental Safety in the Workplace, with Agorize
Read