Career Advice

保持冷靜,頭腦清醒:6招平復面試前緊張情緒

3
min read
Tiffany Wong

3個面試前小貼士

1)冥想或做運動

如果你發現自己成日嘆氣,或者非常緊張,心跳得好快,可以試吓俾個時間自己靜落嚟,專注自己嘅呼吸,暫時唔諗其他嘢。咁樣可以平復返心跳同心情,令到個人清醒啲。另外,亦都可以試吓去做運動,無論係喺屋企跟着影片做運動,落街跑步或去gym room,做運動可以令我哋嘅身體放鬆返,又可以分散一下注意力,平復情緒。


2)食得好

食得好並唔係叫我哋去大魚大肉,俾自己享受人生咁食一餐好嘅嗰種意思。而係花啲心機去挑選自己食嘅嘢。食啲有營養嘅嘢,例如蔬菜、生果,新鮮食材例如雞蛋或者牛奶。盡量少飲咖啡同酒精,多飲水。


3)多練習

確保自己喺面試之前有充足嘅時間做足夠嘅準備,足夠令自己安心行入面試場地。即使你認為你已經準備過好多次,已經熟習晒你要講嘅嘢,都唔好忽視練習增強你嘅肌肉記憶可以舒緩到嘅心理壓力。或者你個腦唔需要再練習,但係你嘅聲帶、頸、膊頭、雙手同雙腳可能都需要某程度上嘅練習去適應面試嘅環境。


3個應試壯膽技巧

4)聆聽

保持清醒,細心聆聽對方講乜嘢,如果人哋問你問題,停一停,諗一諗,諗清楚你自己要講乜嘢再答。花多一兩秒組織好先答,俾自己有條理啲講,又確保你同對方唔會疊聲。


5)慢慢嚟

保持自己嘅節奏,唔好因為自己已經諗好晒點樣講就一輪嘴機關槍咁講。唔好講嘢講到好似背咗劇本咁,因為萬一你講錯一兩隻字,會令你更加緊張。最重要講嘢要自然、清楚。

6)身體語言

注意自己嘅呼吸,呼吸長而深會令自己嘅神經冇咁緊張。又可以留意下自己會唔會有因為緊張而出現嘅小動作,例如䟴腳、揸實拳頭或者縮起膊頭。呢啲身體動作都會影響你嘅情緒、心理狀態,令你變得更加緊張。


最後最後!


專注喺自己控制範圍之內嘅嘢

預早執好嘢、燙定衫、早啲瞓,喺面試之前嗰晚儘量保持平靜,減少自己要擔心嘅嘢。


緊張係好自然嘅事,但記住,只要你做足準備,盡力應試,其他因素都係睇運氣!盡咗力就得㗎喇!老土但係真嘅。



Recommendations for You

4 Tips to Answer "How Do You Make Important Decisions?"
Read
Keeping up Employee Recognition while working from home
Read
6 Tips to Calm Your Interview Nerves
Read