Career Advice

熟讀勞工法例,唔好俾人搵笨!Intro to Labour Law & Labour Insurance in Hong Kong

3
min read
Tiffany Wong

熟讀勞工法例,唔好俾人搵笨!


依家興創業,好多人都自己開公司,各位職場新鮮人,啱啱出嚟做嘢可能都會入咗細公司做,有時唔係雇主立心不良要哈你,但係可能連佢哋都唔熟悉勞工法例,好多你應有嘅福利就咁樣化成為煙!


所以啱啱出嚟做嘢嘅你,一定要清楚知道法例係點樣保障你!


  1. 合約

法律上,口頭合約同書面合約係同樣有效,但係當然書面合約白紙黑字所有條款寫清楚,對雙方嘅保障就更加穩陣。僱主如果同你簽咗書面合約,根據法例佢係一定要俾返一份副本你,好多時候僱主都會等你簽完先到佢簽,最後唔記得咗俾返你。你係可以理直氣壯問佢攞返嘅。另外,如果你查返勞工法例,僱主喺合約入面俾你嘅福利同權利比法定規定嘅少,合約係無效嘅。


  1. OT補假或補水

喺現時嘅香港勞工法例,的確冇對超時工作補償嘅規管。有啲老細有時仲會同新人講,好多公司都冇補假或者補水㗎啦。但係呢個並唔係事實,好多大公司就算超時工作唔按比例計時新,都會按比例計返假期俾員工。OT嘅補償制度最好喺你入職嘅時候同老細傾好,如果你同意左一個完全冇補償嘅合約,到時OT到天昏地暗你就真係蝕晒底啦。


  1. 有薪年假

法律上,對於唔同年資嘅員工有唔同嘅最少有薪年假嘅規定,例如你做滿12個月,就可以有七日有薪年假。雇主有權要求你幾時放年假,但必須要有14日書面通知。但雇主唔可以喺合約入面加入任何令你放棄年假換取款項嘅條文。放棄年假換取款項其實係合法嘅,但只限於有10日以上年假嘅人士。例如一個有12日年假嘅人,就可以最多放棄兩日年假換取相等於兩日嘅薪金。

  1. 強積金

只要你有合約生效起60日後都未完約,就算你60日入面只係返咗一日工,公司都要幫你供強積金。雇主要作出相等於僱員入息5%嘅強制性供款,花紅亦都計喺入息嘅一部份。僱員亦都要供相等於入息嘅5%,呢5%通常都會直接喺人工度扣除,直接供落強積金戶口。如果你啱啱轉工,可以睇下點樣轉返以前嘅供款落同一個戶口,方便管理。


以上只係最普遍,最基本嘅勞工法例知識,如果你有任何疑問,上勞工處網頁睇清楚呀!


Recommendations for You

Happyer Exclusive: Mental Safety in the Workplace, with Agorize
Read
10條至hit面試題目 10 Likely Job Interview Questions in 2021
Read
Working Smarter With GoodNotes
Read