Career Advice

返Intern⋯⋯係咪真係會令你得到一份「真」工作? Will an Internship Really Lead to a ‘Real’ Job?

3
min read
Tiffany Wong

恭喜晒!經過幾年捱更抵夜嘅奮鬥,你終於畢業喇!而家係時候要挑戰更艱巨嘅任務:喺冇工作經驗嘅情況下搵工!


相信你都知道嗰種感覺,夾雜興奮同不安——興奮終於讀完書,興奮你自己將會得到一份真正賺錢嘅「工作」,你將會因為貢獻社會而受尊重,你啲姨媽姑姐可以喺每週雀聚攞你嚟認下叻,你可以大搖大擺咁着住老西返工唔使再着嗰啲人哋一睇就認得出你邊間U嘅衣着。最重要嘅係,你終於有機會諗吓你自己賺咗嘅人工可以點洗!


如果由學生變專業係咁順暢就好喇!今時今日,搵第一份工已經唔再係從一堆招聘職位中選擇。好多時候,fresh grad如果想搵到一份好工,首先就要做免費勞工。喺所有僱主都希望請有「工作經驗」嘅人嘅同時,作為fresh grad可以點好呢?Internship計唔計呢?老實講,呢條可能係你唯一可行嘅路。以下就會教你點樣由intern變專業。


點樣將你嘅實習經驗轉化為對老細有用嘅好處

其實好多招聘經理同僱主都接受internship作為工作經驗,無論係有薪、無薪定係大學課堂計credit嘅實習。但係有啲僱主亦都會分你係學術定係實務嘅實習。前者會比較蝕底,因為僱主會覺得你只係涉獵左行業嘅理論知識。


另一方面,實務嘅實習對於僱主來講會被睇高一線,而通常都會較大機會令你得到一份正職。但唔好唔記得,一部份雇主都會有嗰種實習同現實工作差好遠嘅諗法,除非你可以證明俾佢睇你實習嘅時候都係幫手做一啲真正嘅project、可以拎到appraisal俾佢睇。


僱主點睇你嘅實習經驗,好大程度在於你點樣量化同形容,成為可以為公司增值嘅經驗。所以,千祈唔好怕羞,即管跟住以下嘅提示試吓啦!


首先,你要爭取一個面試機會,所以如果符合以下條件,你可以將實習經驗列喺履歷上面:


  • 呢份係你選擇嘅行業入面第一份申請嘅工作。任何嘅工作經驗都好過完全零經驗。


  • 你嘅實習經驗同你申請緊嘅職位有關係。


  • 你喺實習過程中有重要嘅成就,就算呢啲成就未必同你申請緊嘅職位有關,都可以喺履歷上列出。


如果你已經有其他「真正」嘅工作經驗,可以唔使寫實習喇。


咁究竟喺履歷上點寫先好呢?

只要有效咁喺履歷上表達到你嘅實習經驗為你帶嚟嘅好處,實習經驗絕對可以增加你被錄取嘅機會。


  • 首先,講吓你喺實習入面負責嘅事項同你嘅成就,講吓你學咗或者應用咗嘅技巧、技能。


  • 如果可以,用數據講吓你點樣為你實習嘅公司增值。


  • 唔好將你嘅實習經驗同其他唔關事嘅工作經驗相提並論。你好應該為實習經驗開一個新嘅類別。你可以衡量下實習經驗同其他工作經驗邊樣同你申請緊嘅職位比較有大嘅關連,比較相關嘅可以放先。


  • 花啲心機做好格式。清楚列明每一份實習嘅主辦機構、時間、職位名稱同埋你嘅職責。


最後,要記住你嘅實習經驗絕對對你求職有好大幫助。從一個人嘅實習經驗多與少、有定冇可以睇得到一個人有冇把握讀書嘅時光去增進對行業嘅認識,亦都可以預視到一個人入到公司需要幾多時間先可以從乜都唔識嘅黃毛小子融入變成公司一個有用嘅齒輪。所以,當你乜嘢工作經驗都冇嘅時候,即管將你嘅internship經驗放落履歷啦!

喂喂!呢度有更多做履歷表嘅貼士

Recommendations for You

Spreading Success with Statrys
Read
7 Managerial Interview Questions & How to Answer Them
Read
4 Ways to Thrive Working at a Startup
Read