Career Advice

10條至hit面試題目 10 Likely Job Interview Questions in 2021

3
min read
Tiffany Wong

見工面試嘅事前準備實在要考慮太多太多唔同嘅因素,以下落嚟我哋整合左一系列見工最常問嘅問題,幫你一次過K.O. !


「介紹一下自己吖」呢啲最傳統最普遍嘅面試問題,看似簡單,但都可能令你左度右度都唔知點答最好。嚟到2021年,有咗疫情,社會環境、政治環境亦都改變咗好多,面試除咗面對面喺間房入面舉行,仲可以隔空對住個電腦屏幕講嘢。有啲面試問題已經改變左,亦都係因為有咗網上面試,衍生左啲新嘅面試問題。以下係一啲答案範本,歡迎各位將佢哋改成能夠反映自己個性嘅版本,記咗佢,到時面試答題就可以冇咁緊張。


1)介紹吓自己吖

宜:答呢條問題嘅重點係要簡而精,你做咗起碼都20幾年人,其實要講可以講好耐。千祈唔好當寫緊一本自傳咁所有關事唔關事嘅都講晒出嚟。最主要係俾人知道你而家喺邊度返緊工或者做緊啲乜嘢,關於應徵嘅職位,你有啲乜嘢經驗同長處係相關嘅。準備呢條問題之前,睇清楚職位嘅描述同埋花少少時間整合下呢間公司嘅形象或者文化,對你去篩選自己要搭啲乜嘢會非常有幫助。


忌:吹噓、講大話。


2)我哋點解要請你?

直:善用你對公司同職位嘅資料蒐集所得,話俾面試官知你可以點樣幫助呢間公司渡過難關、解決問題、更上一層樓等等。你亦都可以再提一提點解你比其他應徵者優勝,而且唯獨你係最適合呢一個職位。


忌:因為人哋一句「我哋有好多高質素嘅應徵者。」而感到氣餒,好多面試官都鍾意咁講,睇吓你點樣反應。要保持對自己嘅自信,相信自己嘅能力。


3)你點解想加入呢間公司?

宜:顯示你熟悉呢間公司嘅文化同價值觀,講吓你自己嘅性格同價值觀點樣融入到呢間公司。你亦都可以講吓你有啲乜嘢想做,而點解加入呢個職位可以幫你達到你自己嘅個人目標。要突顯呢間公司係你其中最想工作嘅地方之一。


忌:關於公司嘅嘢乜都唔知,或者提及呢間公司「高薪糧準」等等類似嘅「優點」,更加唔好提及你send咗好多CV出去。


4)點解你會想離開本身嘅工作?

宜:過濾同包裝所有對舊公司唔滿意嘅地方,將所有嘢都變做正面嘅,例如「我喺呢間公司做咗五年之後,我發現自己都係想加入一間專注發展環保科技、公平貿易嘅公司。」如果你係自願離開嘅,解釋吓點解會有咁嘅選擇,例如你想俾自己一個新嘅挑戰,而相信應徵嘅呢間公司會俾到你。你可以提及你所應徵嘅公司一啲特定嘅政策點樣吸引你。


忌:數臭你舊公司舊同事或者話你做同一樣嘢做到悶,想轉吓環境。害怕承認自己係俾人炒:你一定要承認咗先可以再繼續講你究竟從呢個經驗學到啲乜嘢,而你可以講啲好聽啲嘅原因,例如公司裁員、削減開支等等。


5)你嘅期望薪酬係幾多?

宜:為自己搵啲優勢,首先問返面試官佢哋預算嘅薪酬大約係幾多,而面試之前,你亦應該考慮過你最低限度可接受到嘅人工係幾多。比面試官一個呢方面大家可以有商有量嘅印象。


忌:盲舂舂開一個價,低估或高估自己係對方心目中嘅價值。


6)你比其他應徵者有咩優勝之處?

宜:提及一啲喺你工作生涯中嘅實例,例如「我喺初創企業做過唔同嘅職位,基本上公司唔同嘅範疇我都了解。相對喺大公司出嚟嘅應徵者,佢哋就冇咁嘅機會了解晒一間公司唔同嘅範疇。」


忌:徬徨,或者以為自己完全冇特別之處。呢條問題好應該係屋企花時間諗吓,咁到時就唔使雞手鴨腳唔知講乜好。


7)三樣你嘅前老闆稱讚過你嘅嘢?

宜:從以前嘅工作評估表格攞答案,講吓以前老闆喺說話上或者非語言上對你嘅欣賞或者稱讚,例如喺眾多見習生之中選擇咗請你做全職,或者稱讚過你係同人合作嘅好拍檔等等。


忌:話你老闆唔鍾意你,或者冇讚過你、完全唔欣賞你。你可以講吓同事或者上司對你嘅稱讚。


8)你覺得五年之後你會有啲咩改變?

宜:係依家嘅社會狀況,真係今日唔知聽日事,好多人都唔敢諗太遠嘅目標。但係答呢條問題嘅時候你仍然可以表達你對將來嘅憧憬,集中由你而家應徵嘅職位出發,想像一啲實際嘅路線,強調你係呢間公司長遠發展嘅興趣。


忌:話俾面試官知你應徵嘅呢份工只係踏腳石,或者講一啲不切實際嘅目標,例如五年後想成為呢間公司嘅行政總裁等等。


9)形容一下一個你喺工作上遇到嘅難題,同埋你選擇點樣解決?

宜:選擇一個真實而又反映到你能力嘅工作事件,如果當時處理得唔係太好,可以照直講而再補充你檢討過後覺得點樣可以喺類似嘅情況再做好啲。


忌:推卸責任,賴落其他同事或者老闆身上。


10)你有冇問題問我哋呀?

宜:把握呢個機會突顯你同其他應徵者唔同嘅地方,你可以問任何喺面試中醒起嘅問題,或者從你喺面試之前對呢間公司嘅資料蒐集所衍生嘅疑問。你亦都可以選擇問對方其實認為你係唔係一個適合嘅人選,或者你有邊啲地方可以改善。雖然呢兩條問題聽落都好似好得人驚,但係其實佢哋可以突顯你對呢份工嘅興趣。


忌:「我OK啊,冇嘢問啦。」永遠都要待定一至兩條問題係袋。唔好問一啲Google好容易搵到答案嘅問題。

Recommendations for You

Is a Master’s Degree Worth the Investment?
Read
10 Signs Your Interview Was a Success
Read
Why Can It Take a While To Hear Back From an Interview?
Read